Табасаран райондин АхьитI гъулан мектебдин волейболин команда волейбол уйнамиш апIбаан уьмуми образование тувру мектебарин командйирин арайиъ кIули гъубху вари Урусатдин «Арсран туп» кIуру турнирин талитариъ финализ удучIвну ва кьюбпи йишван сагьиб гъабхьну.
Вари Урусатдин мектебарин волейболин командйирин арайиъ гьар йисан тешкил апIру талитар ккудушу элгьет йигъари Москвайин областдин Раменское шагьриъ кIули гъушну. «Арсран туп» волейболин турнирин аьхиримжи этапдиз Урусатдин регионариъ варитIан заан натижйир улупну ва гъалиб гъахьи 16 команда удучIвну.
Табасаран райондин АхьитI гъулан уьмуми образованиейин кьялан мектебдин волейболин команда турнириъ финализ Самарайин областдин Новокуйбышевск шагьрин 11-пи нумрайин мектебдин волейболин командайихъди удубчIвну.
Амма Новокуйбышевскдин мектебдин волейболин команда ихь баяртIан цIиб кIубанди вуйи. Гьаддиз ихь баяр арсран медаларин сагьибар гъахьнийи.
