Урусатдин образованиейинна илимдин министр Ольга Васильевайи, РФ-дин Госдумайиъ удучIвну улхури, мялимар жюрбежюр ва гизаф кьадар гьякь-гьисабар дикIбахьан азад апIувал ккун гъапIну.

Федералин идарайин кIулиъ айирин фикриинди, мялимари анжагъ юкьуб документтIан ацIну ккундар: гьар йигъандин ляхнин темйирин план, электрондин дневник, предметарин программа ва электрондин журнал. Ольга Васильевайи къайд гъапIганси, имбуну тIалаб апIурайи гьякь-гьисабари образованиейин ляхниз анжагъ манигъ’валтIан апIурадар. Фицики, гьякь-гьисабар тувну ккуни аьхю кьадар ва жюрбежюр документари мялимдин гизаф вахт ва кьувватар дурар ацIбиина жалб апIура.

Министри гьацира статистикайиан улупбарра арайиз адагъну. Думу улупбариинди, педагогвалин вузар ккудукIу выпускникарикан анжагъ 70 проценттIан мектебариз лихуз гъягъюрадар. Ольга Васильевайи къайд гъапIганси, бицIи маважибариз дилигди, диплом хьайи пишекрар мектебдиз дурушрувайивал жюрбежюр гьякь-гьисабар гьязур апIувалихъдира аьлакьалу ву.

Ольга Васильевайин гафариинди, дугъу тартиб гъапIу цIийи жягьтлувал сабпи сентябрь улубкьайиз гьяракатнаъ ипди. Гьамусяаьт образованиейин министерствойин ихтиярариз лигру отделин пишекрари мялимдин ляхнин гьякь-гьисаб улупурайи кагъзар адрацIбан къарар адабгъуз ихтияр аш ахтармишар гъахура. Фицики бязи мектебар муниципалитетарин дахилнаъ а.