Июндин 26-пи йигъан Дагъустандин Глава Владимир Васильевди республикайин гьюкмин органарин кIулиъ айидарихъди совещание кIули гъубхнийи. Совещаниейиъ региондиъ уьмриз кечирмиш апIурайи «Кьяняаьтлу правительство» проектдин месэлйир гьял гъапIнийи.
2018-пи йисан октябрин вазлихъан хъюгъну, «ГК «Росатом» «ПСР» гьясиллувалин гъурулуш» АО-йин кюмекниинди Дагъустандиъ республикайин швнуб-саб министерствойи му проект уьмриз кечирмиш апIура. Сабпи натижйирра а.
Му технологияйин мяна – инсанарихьна ужуди янашмиш хьувал ва вахт кьяняаьтлуди, мянфяаьтлуди ишлетмиш апIувал ву. «Кьяняаьтлу правительство» проектди гьюкуматдин ва муниципалин идара апIувалин мянфяаьтлувал швнуб-саб ражари за апIуз мумкинвал тувра.
Совещаниейин иштиракчйир 2019-пи йисан сабпи 6 вазлиъ гъапIу ляхнин натиж-йирикан ва гележегдиъ гьял дапIну ккуни месэлйирикан гъулхнийи.
Республикайиъ «Кьяняаьтлу правительство» проект уьмриз кечирмиш апIбакан улхури, РД-йин Главайин ва Правительствойин Администрацияйин кIулиъ айи Владимир Ивановди къайд гъапIганси, вахт – кьяляхъ апIуз даршлу, варитIан кьиматлу дакьат ву.
Гьамусяаьт проектдиз РД-йин гьюкмин ляхин кIулиз адабгъру 20 орган, МФЦ, гьюкуматдин ва мунициалин 26 идара, гьадму гьисабнаан сагъламвал уьбхбан 17 ва образованиейин 6 идара жалб дапIна.
Гьацира проектдиъ Мягьячгъала шагьрин Администрация, РФ-дин Пенсйирин фонднан Мягьячгъала шагьрин Кировдин ччвурнахъ хъайи райондин отделениейин идара, РД-йиъ айи медицинайинна социалин экспертизайин кIулин бюро, Сергогъала, Къяякент, Къизилюрт районар иштирак шула.
Вахт кьяняаьтлуди ишлетмиш апIувал ляхин дюзди тешкил апIуваликан асиллу шула.
2019-пи йисан 2-пи кварталин натижйириинди, 20 проект уьмриз кечирмиш дапIна, гьадму гьисабнаан 12 проект сагъламвал уьбхбан идарйириъ.
Республикайин образо-ваниейин ва илимдин Министерствойи гьаму йисан кьюбпи кварталиъ 5 проект уьмриз кечирмиш гъапIну.
Инсанарин вахт кьяняаьтлуди ишлетмиш апIуз МФЦ-йи аьхю кюмек тувра. МФЦ-йиан харижи уьлкйириз гъягъругандин паспорт тувували МВД-йин идарйириъ машин хъапIуз ихтияр тувру шагьадатнама гьюдюхювалин нубатар цIиб гъапIну ва гьар йисан республикайин бюджетдиз госпошлинайилан 100 миллион манат пул хура.
Кьяняаьтлуди вахт ишлетмиш апIбан проектдин асас метлеб – агьалйириз яша-йишдин гъулай шартIар арайиз хувал ву.
Региондин кIулиъ айири СМИ-йин вакиларикан, жямяаьтлугъдикан проект уьмриз кечирмиш апIбан ляхниъ иштирак хьувал ккун гъапIну.
