Йиз багъри Пилигъ Аьлибег ва Периханум бажи Аьлимурадоварин хизан гъулаъ яшамиш шулайи аьхю хизанарикан гьисаб шула. Дурарин кюлфет 1968-пи йисан яратмиш гъапIуб ву. Армияйиан гъафи Аьлибег халуйи совхоздин машиндихъ шоферди, хъа Периханум бажи гъулан халачйирин фабрикайиъ лихури ва хулаъра халачйир урхури, чпин мадар хъапIри гъахьну.

Аьлибег халуйин ва Периханум бажийин хизандиъ 4 байна 8 риш гъахьнийи. Дурарин ччвурар: Гьяжимурад, Мягьямед, Гъизбика, ФатIмат, Тахмина, Жамалат, Сарият, Марьят, Арьят, Барият, Руслан ва Арсен. Гъи вари баяр-шубар, чпин хал-хизанар ккергъну, жюрбежюр йишвариъ сагъ-саламатди яшамиш шула.

Аьлибег халу улихьна йисари кечмиш гъахьну. Периханум бажи, жвуван худлар тербияламиш апIури, чан бицIину балихъди яшамиш шула. Ич арайиъ гъабхьи сюгьбатнаъ дугъу, читинваларикан улхури, гьамци гъапнийи:

«Улихьдин девриъ вари хизанариз дурар алахьуйи. Ич хизандизра читинвалар гъяркъну. Амма йиз жилир Аьлибеган ужуб хасиятнахъди аьлакьалу вуди ич хизандиъ гьаммишан мясляаьт ва албагувал ади шуйи. Хизандиъ саламатвал айиган, айибдиин разивал улупруган, вари читинвалар улдучIвну гъягъюйи. Малар, чарв-йир уьрхюри шуйча. Аьхюну веледари ич мяишатдиъ жюрбежюр ляхнариз чпихьан шлуганси кюмекар апIуйи, учу хулаъ адру вахтна, бицIину гъардшариз лигуйи. Хизандин варитIан аьхю девлет – албагувал ву. Йиз веледари гьамусра, чиб-чпиз кюмекар апIури, сар сарин гъаразнаъ а. Дурар сумчрариъ, машкврариъ, саламариъ сатIиди уч шули, вари ляхнар сатIиди гьял апIруган, юкIв шад шулиз. Жвуван веледар албагну ва сагъди рякъювали бабан юкIв рази апIуру»,

– гъапнийи Периханум бажийи.
Периханум бажийиз жандин сагъвал, кIван разивал, хизандин бахт хъана артухъ хьувал ккун апIурхьа.