Июлин 13-14-пи йигъари Москва шагьриъ спортдин джиу-джитсу жюрейин кчIихбариан вари дюн’яйин чемпионат кIулиъ гъубшну. Думу чемпионатдиъ Дагъустандиан хайлин спортсменар иштирак гъахьну. Талитариъ иштирак гъахьи ихь ватанагьлийир Рамазан Гьясратовди 3-пи йишв ва Марат Гьяжикъурбановди 2-пи ва 3-пи йишвар гъадагъну.
Рамазан Гьясратовдин гафариинди, му чемпионат хьайиз улихьна думу грепплинг спортдиан Урусатдин чемпионатдиъра иштирак духьну, душваъ 1-пи йишв гъадабгъну ва августди гъябгъру Европайин чемпионатдиз гъядягъну. Хъа 13-14-пи июлиъ кIулиъ гъубшу джиу-джитсуйиан чемпионатдиъ 75 кило гъагъишин айи категорияйиан кчIихбариъ иштирак гъахьну. Талитариъ хайлин цIийи спортсменар айивализ лигну, Рамазандихьан чан гъагъишнан категорияйиъ сарпир хьуз гъабхьундар. Шубубпи йишван сагьиб хьпан бадали, думу Бразилияйиан вуйи спортсмендихъди талитназ удучIвну ва дугъ’ин гъалиб гъахьну.
Марат Гьяжикъурбановдикан улхуруш, думу му жюрейин спортдиан аьхиримжи вахтари ужудар хъуркьувалар улупурайи спортсмен ву.
Маратдин гъагъишнан категория 70 кило ву. Гъубшу чемпионатдиъ, узу зиихъ къайд гъапIганси, Марат кьюбпи ва шубубпи йишварин сагьиб гъахьну.
«Эвелиан йиз категорияйиъ иштирак хьуз кIури аьрза тувдар 7 спортсментIан дайи. Чемпионат ккебгъайиз гьаз-вуш дурари чпин аьрзйир кьяляхъ гъадагъну, имбудар 4 кас вуйча. Хъа гъагъишин ебцру йигъан сарсан спортсменди чан аьрза кьяляхъ гъапIну. Гъуздар 3 дагъустанлуйир вуйча. Сарпирихъди кчIихбан кьяляхъ кьюбпирихъди талитнаъ учIвайиз рягьятвал гъадабгъуз цIибтIан вахт тувундайзуз (4 дакьикьа). Яна йиз гъагъишнан категорияйиъ сабпи талитнаъ гъалиб гъахьунза, хъа кьюбпи талитнаъ – магълуб. Натижайиъ узуз кьюбпи йишв тувну.
Гьаму талитарин кьяляхъ узхьан хъанара талитназ удучIвуз шлуб аьгъю гъабхиган, узу абсолютный гъагъишнан талитариъ иштирак хьуз аьрза тувунза. Душваъра сабпи ва кьюбпи кчIихбариъ гъалиб гъахьунза. Хъа финалиъ 130 кило гъагъ айи спортмендихъди талитнаъ магълуб гъахьунза. Шубубпи йишв гъадабгъбаз вуйи талитнаъ 90 кило гъагъ айи талитчийиин гъалиб духьну, шубубпи йишван сагьиб гъахьунза», – гъапнийи Марат Гьяжикъурбановди.
