Гьаму улихьнаси ихь газатдиъ Урусатдиъ сабпи ражари вуди Калининград шагьриъ гъушу талитариъ Багьаудин Абасовди «Кагьрабайин чIул» гъазанмиш апIбакан гъибикIнийча.

 

Июлин 13-пи йигъан Дербент шагьриъ «Марракеш» банкетдин залиъ шагьрин Собраниейин депутатарин тешкиллувалиинди спортдин ктикьу жюрейин кчIихбариан вари дюн’яйин ургуб ражари чемпион Багьаудин Абасов тебрик апIбаз вуйи серенжем кIули гъубшну. Му мяракайиъ Дербент шагьрин главайин заместителар Шамиль Аьлиев ва Заур Эминов, Табасаран райондин глава Мягьямед Къурбанов, Дагъустан республикайин Халкьдин Собраниейин депутатар Ферзилагь Исламов, Велиюлла Фатялиев, Багьаудиндин гъардаш, ушу-саньдайиан вари дюн`яйин кьюб ражари чемпион Назим Абасов, спортдин, жямяаьтлугъ тешкилатарин кIули айидар, адлу спортсменар ва спортдин ММА-йин жюрейин кчIихбариин машгъул вуйидар иштирак гъахьну.

Шагьрин Собраниейин депутатарин терефнаан чемпион цIийи гъалибвалихъди тебрик апIури, Айваз Аьлихановди Багьаудин Абасовдиз гележегдиъ хъана аьхю хъуркьувалар ккун гъапIну.

Шагьрин администрацияйин главайин терефнаан Шамиль Аьлиевди спорт артмиш апIбаъ ужудар натижйир улупури, аьхю зегьмет зигурайи варидюн`яйин FCA лигайин федерацияйин президент Вадим Аслановдиз чухсагъул мялум гъапIну ва Багьаудин Абасовдиз хъана заан хъуркьувалар ккун гъапIнийи. Дугъу Дербент шагьрин глава Хизри Абакаровдин ччвурнахъан бажаранлу спортсмендиз спортдиъ заан хъуркьувалар гъадагъбаз ва намуслу зегьмет зигбаз лигну Гьюрматнан грамотара тувнийи.

2007-пи йисхъан мина аьхю спортдин жюрбежюр талитариъ ужудар натижйир улупурайи Багьаудин Абасов гизафдариз ужуди таниш ву. Серенжемдиъ думу тебрик гъапIдари варидари му жигьил чемпион аргъаж шулайи баяр-шубариз нумуна вуйиваликан, дугъу жигьиларин спортдихьна вуйи маракьлувал артухъ апIурайиваликан гъапнийи.

Шадлугънан серенжемдиз уч духьнайидари Абасоварин хизанра му гъалибвалихъди тебрик гъапIнийи.

Дагъустандин мяълийирин устадари серенжем чпин мяълийириинди гъабалгнийи.