Табасаран район арайиз дуфну 90-йисандин юбилейин серенжмарин дахилнаъди жюрбежюр конкурсар гьяракатнак кирчна. Гьадрарикан саб конкурс «Табасарандин нурар» газатдин редакцияйи райондин администрацияйихъди сатIиди тешкил дапIна. Думу конкурс мектебариъ урхурайидарин арайиъ шубуб номинацияйиан гъабхурайиб ву: багъри гъулкан/райондикан сочинение бикIуб; шикил зигуб; шиир бикIуб. Гъалиб гъахьидар райадминистрация пешкешарихъди лишанлу апIиди.

Мидланра гъайри, социальный сетариъра райондин юбилейиз бахш дапIнайи жюрбежюр конкурсар кIули гъягъюра. Мисалназ, Инстаграмдин @tabasaran кIуру машнаъ райондин 90 йисандин юбилейихъди аьлакьалу вуди, Табасаран райондин гъуларин шикларин конкурс тешкил дапIна. Дестейин администраторин гафариинди, сар касдихьан конкурсдиз мяна ачухъ апIру бицIи текстра хъади, анжагъ саб шикилтIан, хътапIуз шулдар.

«Конкурс тешкил апIруган, узу гизаф фикрар гъапIнийза. Асас метлеб – ихь уччвудар гъулар варидиз рякъюб вуйиз. «Табасаран – кьюбпи Швейцария ву» гьаци гьавайиди кIурайиб дар. Ихь Ватан вари терефарихъанди гизаф гьяйран шлу йишв ву. Гьаддиз узуз гьаму жюрейиинди ихь гъулар варидариз дяркъну ккун гъабхьунзуз», – кIура конкурсдин тешкилатчийи.

Конкурсдиъ райондин агьалйир аьхю аьшкьниинди иштирак шула. Думу 31 августдизкьан давам хьибди. Гъалибчи 31-пи августди тамашичйири диву «лайкариинди» тяйин апIиди. Эгер учвуз, ичв гъул конкурсдиъ иштирак дубхьну ккундуш, гъулан шикил ватсапдин 8 928 836 02 37 нумрайиз хъадапIай.