Дагъустандин Глава Владимир Васильевдин регьберваликкди гьар гьяфтайи гъябгъру яшайишдин важиблу месэл-йириз бахш дапIнайи совещаниейиъ региондин аьтрафариин «Земский доктор» проект уьмриз кечирмиш апIбан месэла гьял гъапIну.

Доклад хьади РД-йин сагъламвал уьбхбан министр Жамалудин Гьяжиибрагьимов удучIвну гъулхнийи. Дугъу къайд гъапIганси, сагъламвал уьбхбан гъурулушдин ляхнин ери пишекрарихъди тяминвалилан, пишекарвалин гьязурлугвалилан, дурарин аьгъюваларилан асиллу шула. Гъулар медицинайин пишекрарихъди тямин апIбаъ «Земский доктор» программайи асас йишв дибисна.

«Думу программа уьмриз кечирмиш апIурайи 5 йисандин муддатнаъ 1080 духтир гъулариз ляхин апIуз гъушну. Тевбан бадали: 2018-пи йисан республикайин агьалйирин сагъламвал уьбхбан гъурулушдиъ 10233 кас духтрар лихурайиш, гьадму кьадарнакан 3408 пишекрар гъулариъ лихурайи», – гъапну Ж.Гьяжиибрагьимовди.

Дагъустандин сагъламвал уьбхбан министерствойин кIулиъ айирин гафариинди, гъийин йигъаз гъулариъ 421 штат духтрар адарди гъузна. Гизафси гъулариъ бицIидарин духтрар, терапевтар, рентгенологар, фтизиатрар, анестезолог-реаниматологар гьуркIрадар.

Чан улхбаъ Ж.Гьяжиибрагьмовди къайд гъапIганси, гьаму йисан «Земский доктор» программайин дахилнаъди гъулариъ 224 духтир ва 10 фельдшер ляхниз гъадагъбанди ву. Гъийин йигъаз 52 духтир ляхниз гъадагъна, гьадрарикан 41 кас – гъулариъ, 11 кас – бицIи шагьрариъ, гьацира 7 фельдшер.

Совещаниейиъ къайд гъапIганси, «Земский доктор» программайин дахилнаъди гъулариъ ляхин апIурайидарихъди гьерхбар кIули гъухну. Дурариан мялум гъабхьиганси, жигьил пишекрари гъулаъ ляхин давам апIбан бадали, муниципалин образованйирин терефнаан дурар яшамиш шлу хуларихъди ва яшайишдин жара гъулайваларихъди тямин апIувал лазим ву.

Министрин доклад аьлава апIури, Дагъустандин Главайи гъулариз жигьил пишекрар гьаъбан зиин артухъси ляхин дапIну ккуниваликан гъапнийи.