Июлин 29-пи йигъан Урусатдин Почтайин Дагъустандиъ айи филиалин директор Мягьяч Мягьямедов РД-йин информатизацияйин, аьлакьйирин ва махлукьатлу коммуникацйирин министр Сергей Снегиревдихъди гюрюшмиш гъахьну. Гюрюшдиъ гъитIибкку асас месэла почтайин гъурулушдиъ лихурайи пишекрарин вазлин маважиб за апIбан гьякьнаан вуйи. 

Мягьяч Мягьямедовди къайд гъапIганси, республикайиъ почтайин гъурулушдиъ лихурайиъ 2,6 агъзур касдин маважибар 20% за апIиди, гьадму гьисабнаан, операторарин, почтальонарин, почтайин отделенйирин кIулиъ айидарин ва дурарин заместителарин.

Дугъан гафариинди, маважибар за апIбан программа кьюб пайнаъди кIули гъябгъиди. Сабпи пай ккудубшу йисан майин вазлиъ ккебгъну. Думуган маважибарин кьадар 20%-дин уьлкейин 17 региондиъ за гъапIнийи. Дагъустан республика 2019-пи йисан ноябрь вазлиъ ккебгъру программайин кьюбпи пайнак кипна. КIулди гъадабгъуруш, программайин дахилнак Урусатдин Почтайиъ лихурайи 224 агъзур пишекар кахьди. Программа юрутмиш апIувал 2020-пи йисан ккудубкIиди.

Умуд кивурхьа, маважибар за гъапIхъан тина почтальонари пресса вахтниинди думу урхрударихьна рубкьуз хъюгъюр, кIури.