Уьлкейиъси, республикайин жюрбежюр цирклариъ баркаллу зегьмет зигурайи ватандашарин арайиъ табасаран халкьдин вакиларин ччвурар ктухруган, рази дархьиди гъузуз шулдар. Гьацдарикан сар ихь ватанагьли, Хив гъулаъ бабкан гъахьи Тамила Гьясанбегова ву.
Тамила Гьябибуллаевна Республикайин Расул Гьямзатовдин ччвурнахъ хъайи биб-лиотекайин юрд аьгъю апIру литературайин ва милли чIалариинди вуйи китабарин отделиъ лихури 22 йис шула; гьамусяаьт гьадму отделин кIулин библиотекарь ву. Дугъу жигьилар, бицIидар милли литературайихьна жалб апIура, табасаран чIалниинди чапдиан удучIвнайи китабарин выставкйир тешкил апIура, студентарихъди ляхин гъабхура.
«Ич отделиз жигьиларилан, студентарилан гъайри, яшлу инсанарра гизаф гъюри шулу. Дурариз асас вуди газатариъ, журналариъ айи мялуматар урхуз, дурарин гьякьнаан чпин фикрар ачухъ апIуз кьабулди шулу. Эгер ухьу гъи библиотекайиз гъюрайи табасаранарикан улхуруш, дурари гизафси Гюлбике Уьмаровайин, Абумуслим Жяфаровдин, Шамил Къазиевдин, Юсуф Базутаевдин, Манаф Шамхаловдин, Багьаудин ва МутIалиб Митароварин китабар гьерхри шулу», – ктибтура Тамила Гьясанбеговайи.
Библиотекайиъ, эгер китабадихъ юкIв хъадарш, урхуз ккундарш, лихуз шлуб дар. Тамилайиз чан пишекарвал кIваантIан ккунду. Гьеле мектебдиъ урхури амиди думу художествойин литературайиин гизаф юкIв алир вуйи. «Гъи узуз ихь табасаранариз, сабпи нубатнаъди багъри юрд ахтармиш апIру, тарихдикан вуйи китабар, ихь классикарин яратмишар урхай кIури, теклиф дивуз ккундузуз. Деврин шаирар, писателар фужар вуш, дурари фтикан бикIураш, аьгъю апIинай. Ич отделиъ, мисалназ, 80-агъзуртIан артухъ китабар а. Ихь республикайиъ чапдиан удучIвурайи вари авторарин шубуб китаб библиотекайиз тувра. Аьхиримжи йисари Шагьвелед Шагьмардановдин, Гюлбике Уьмаровайин, Эльмира Аьшурбеговайин, Аьбдурягьим Аьбдурягьма-новдин китабари библиотека девлетлу гъапIну», – кIура Тамила Гьябибуллаевнайи.
Республикайин милли биб-лиотекайиъ табасаран халкьдиз серенжемар лап цIибтIан дурурхрайивали, думу мажлисариъ цIибтIан тамашичйир иштирак даршулайивали Тамила Гьясанбеговайин кIвак гъалабулугъ кипра.
Хъа багъри халкьдихъан, шаирарин мажлисарихъан, жигьиларин гележегдихъан, багъри тарихдихъан анжагъ дериндиан багъри ватан ккуни, баркаллуди зегьмет зигру, сабурлу касдинтIан юкIв убгудар. Гьацдарикан ву ихь Тамила Гьясанбегова. Гьаму йигъари дугъу чан юбилей къайд гъапIну.
Тамила Гьябибуллаевна, уву юбилейихъди тебрик апIурача. Гъит увуз сагъвал, кIван шадвал, хушбахтвал, гележегдиъ анжагъ шад шлу дюшюшар кьисмат ишри.
