Августдин вазлин эвелиан мина Хив райондин гьарсаб гъулаъ гьар гьяфтайин арайиъ кьюб-шубуб сумчир шула. Гъит, Хив райондиъси, миди вуйи районар-шагьрариъра, гъулар-хлариъра зурнайин ва далдабуйин сес кам дарибшри. Шагьрариан ва жара гьюкуматариан багъри юрдариз, гъулариз чпин багахьлуйирихьна гъюрайи касарин рякъ, илтIикIрушв анжагъ сумчриз, мевлюдназ, юбилейин йигъариз кьисмат ибшри чпин, яраби. Амин!
Багарихьди жвуван веледар эвленмиш гъапIу абйир-бабарихъди гаф-чIал гъабхьнийиз. Дурарихъди гъахьи сасдар сюгьбатарикан учвузра мялумат тувуз ккундузуз. Дурар исихъ чап апIурача.
Хяйруллагь Атлуханов:
«Гьаму багарихьди риш швуваз хъаунза. Ав, дюзди кIуруси гъабхьиш, улихьганси дарди, гьамус жигьилар чиб-чпиз дяркъну, чпин арайиъ гаф-чIал, сир-мясляаьт дубхьну, хъасин абйир-бабари къарар адабгъура. Йиз веледдинра разивал айивализ лигну, дугъан улхьан гъивундарза. Гъивишра, закур саб жараси гъабхьиш, жвуван велед вушра, узуз тягьна йивиди. Гъит, йиз шуран чан ккебгънайи цIийи жилгъа, цIийи хал-хизан бахт айиб ибшри. Бахтна сагъ’вал гъабхьихъан тина имбунуб вари жвуван уьмриъ гъазанмиш апIуз хьиди. Аллагьди тувган, пайгъамбрихьан фукIара апIуз шулдар гъапиганси, гъит, йиз риш Аллагьди тувру агьларикан ишри. Гъит, узу фици разиди аш, вари абйир-бабариз чпин веледар эвленмиш апIру, шадлу йигъар кьисмат ишри. Амин!»
Элизар Гьяжибалаева:
«Гьаму йигъари узура риш швуваз хъаунза. Саб терефнаан, жвуву хил’ин магьиси гъюрхю риш, абин хул’ан малси масу тувруган, дердра шулу. Хъа, тму терефнаан, жвуван веледди цIийи хал-хизан ккебгъруган, гевюл шадвалира абцIру. Гизаф фикрар апIури, дерд кади шуйзуз, яраб йиз риш фила эвленмиш шуйкIан, фициб хулаъ ахъдийкIан, фужаригъна кIваин шуйкIан кIури, юкIв мухриъ убшри адайиз. ИпIру уьлихъ гъафунси, убхру халачийихъ чичнаси, гьарган хилиъ, кIваъ сикинсузвал ади шуйиз. Шюкюр ибшри аьзиз Аллагьдиз, ужуб йишваз кьисмат духьна. Йизси, вари абйир-бабарин мурад-метлеб гьадму вуки, жвуван веледдиз бахт, уж’вал хьуб. Гъит, узуз дярябкъю бахт, уж’вал, шадвал, жвуву гъапIу веледдиз рябкъри, я Аллагь. Амин!»
Закир Везиров:
«Бализ швушв духну, мегьел саб гьяфтара дариз. Гъит, йиз балин юкIв улубкьну духнайи швушван ликрихъди ич хулаъ берекет, рягьимлувал, сабурлувал артухъ ибшри. Думу гъюрхю ва арайиз адагъу, гъи йиз веледдиин, хизандиин хъугъ’вал дапIну, швуваз хъаънайи абйир-бабариз гъурбан ишри! Гъи вари хулариъ 21-пи аьсрин тIалабарихъди бегьемвалар а. Гьаддиз йиз бализ духнайи швушвкан узуз ккуниб анжагъ, чIатан хулаз гъафи касдиз аьлхъру маш дапIну, саб астакан чай улихьна дубхну, дугъан кIанакк гута ккипубтIан гъайри, фукIара дар. Вари абйир-бабариз чпин веледарикан бахт бихъувал ккун апIурза. Гъизигу зегьмет, гъапIу хайирлу ляхнар гьакIанди гъюдучIвру агьларикан даришри чпи. Амин!»
Светлана Нежефова:
«Узура гьаму йигъари риш хъаунза. Гьит, чан цIийи хал мубарак ибшри. Гьадму хулан цалин шибритI, жергейиъ айи гъванарикан саб гъван ишри чав. Йиз хул’ан гъягъруган, дугъаз Фазу Аьлиевайин гафар кIваин гъапIунза: «Яв назвалар, яв бегьем дару ляхнар ихь хулан раккнин гурзлариин гъитну, анжагъ увухьди лазим вуйи аьд-аьдалат хьади гъарах. Фицики душв цIийи хал ву. Хъа гьар хулаъ чан культура, къанун а. Дурар уву ккундушра, ккундаршра кьабул дапIну ккун. Эгер уву, дугъриданра, хулаз-хал, йишваз-йишв кIури швуваз гъягъюри айир вуш, жан риш. Хъа саб фу-вушра кьабул гъабхьундарзуз кIури, минси-тинси гъабхьиб тIублан апIруси гъабхьиш, шил дубгайиз гъидива, жан риш». Дициб рякъ увуз кьисматра дарибшри. Вари абйир-бабариз швуваз гъуху шуркан ерхьру хабрар, апIру зенгар хайирлудар ишри. Амин!»
Самурхан Саруханов:
«Гьаму гьяфтайиъ йиз веледарикан варитIан бицIину байра эвленмиш гъапIунза. Гъит, духнайи таза швушван ликрихъди хулаъ берекет, хал-хизандин арайиъ сир-аьлакьа, мясляаьт артухъ ишри. Йиз веледдин гъайгъушнаъ айир ишри. Багахьлуйириз ва гъуландариз мянфяаьт кайир ишри. Амин!»
Гъит, зиихъ йиз сюгьбатчйири дупнайганси, варидарин веледариз бахт ибшри! Веледар абйир-бабарин гъуллугънаъ ишри. Эвленмиш шулайи жигьиларин ккебгърай таза хал-хизан гьякь-гьюрмат айиб ибшри, дурар сар-сарин гъуллугънаъ айидар, бахтлу уьмрин эйсир ишри. Амин!
