Августдин 20-пи йигъан Табасаран райондин глава Мягьямед Къурбанов Хючна гъулан аьтрафариин ерлешмиш дубхьнайи Ургур чвуччвун ва сар чуччун гъала рас апIуз дакьатар жара гъапIу инвесторар – Гьяжибег ва Идрис Аьлибеговарихъди сатIиди гъалайин аьгьвалат ахтармиш апIуз гъушну.

 

Гъалайиъ рас апIбан ляхнар Табасаран райондин 90 йисандин юбилейин шадлугънан серенжемар къайд апIбахьна гьязур хьпан сяргьятариъди кIули гъахурайидар ву.

Гъийин йигъаз гъалайин цалар ижми апIбан ляхнар кIули гъахувал аьхирихъна дуфна ва гъалайилан рукьан бару илтIибкIна. Гъалайиин инсанар лицру жилгъйириъ гъван ккабхьна. Машквран шадвалин асас серенжемар гъахру майднар марцц ва гьязур апIура.

Гьацира гьамушв’ин, табасаранарин кюгьне хулариз ухшар ади, юрд аьгъю апIру музейин дарамат тикмиш апIбанди ву. Мидин гьякьнаан чан фикрар ва теклифар табасаран машгьур художник – РД-йин лайикьлу художник, Урусатдин художникарин Союздин вакил Аьбдурягьман Уьсмановдира ачухъ гъапIнийи. Хуларин улхьан цаларин терефнирин дубчIвнайи личIву гъванарикан апIиди. Улихьди табасаранари чпин хуларин машар гьациб гъвандихьди балгури гъахьну.

Машгьур меценат Айваз Рамазановди гъалайиина акв зугувал чаина гъадабгъну. Гьадушв’ин фонарар дивуз ва йишвандин вахтнара гъала акварихъди мюгькамди тямин апIуз планламиш дапIна.