Аьдат вуйиганси, урхбан цIийи йис ккебгъайиз, август вазлин аьхиримжи йигъари вари шагьрариъ, районариъ мялимарин конференцйир кIули гъягъюри шулу. Гьаци, 28-пи августдиъ Хив райондиъра конференция кIули гъубшнийи.
Конференцияйиъ райондин вари гъулариан, кIулиъ мектебарин директорар ади, 5-6 мялим, бицIидарин багъарин ва гъуларин кIулиъ айидар иштирак гъахьну.
Серенжемдиъ сифтейин гаф райондин глава вуйи Ярмет Ярметовди гъапнийи. Сифте чан улхбаъ дугъу сад йисандин арайиъ Хив образованиейин отделин начальникди гъахьи Казбек Къазиевди гъизигу жафайиз чухсагъул мялум гъапIнийи ва кьюд йигъ улихьна тазади деркку гъуллугънаъ дугъаз ужудар сяътар, хъуркьувалар хьуб ккун гъапIнийи. Хъасин дугъан ерина райондин образованиейин отделин начальникди тяйин гъапIу Назаряли Тарланов цIийи гъуллугънахъди тебрик ва дугъаз ляхниъ заанвалар ккун гъапIнийи.
Хъасин дугъу чан улхуб мялимарихьинди илтIибкнийи: «Гьюрматлу ва гирами мялимар! Мялим кIуру гаф узуз гьарган заан ва багьа вузуз. Фицики, узу мялимди гъилихур ву кIури ваъ, хъа дугъу зигурайи ляхникан хабар айивалиан. Мялимдин ляхин фициб-вуш, гъи, гьяйифки, вари гъавриъ шуладар… Ичв улубкьурайи урхбан цIийи йис марцци кIваан, вари райондин администрацияйин терефнаан мубарак апIураза. Ичв хиликк ккайи баяр-шубари гьам олимпиадйириъ, гьамсана конкурсариъ ва гъийин йигъан варибдиз кьимат диврайи ГИА-йиан ужудар баллар, натижйир гъадагъури, хъуркьувалар ишричвуз. Жандиъ сагъ’вал ва хизандиан манишин кам дарибшрийичв! Мялим кIуру гафназ икрам апIураза. Чухсагъул учвуз!»
Нубатнан гаф образованиейин начальник вуйи Назаряли Тарлановди гъапнийи. Думу сифте Мягьячгъалайиъ гъабхьи конференцияйиъ Уммупазиль Уьмаровайи гъапи гафар-чIаларикан ва урхбан цIийи йисан улихь дивнайи учIру меселйирикан гъулхнийи. Хъасин райондин образованиейин аьгьвалатнакан, мектебариъ ккудукIнайи ва гъягъюри имбу рас апIбан ляхнарикан, ккудубшу йисандин ЕГЭ-йин ва ОГЭ-йин натижйирикан, кьюбпи ражну экзаменар тувдарикан, лагерариъ гъахьи баяр-шубарикан, категория айи ва адру мялимарикан, повышениейиз гъягъюрайи ва дурушрайидарикан, конкурсариъ, олимпиадйириъ хъуркьувалар улупурайи мектебарикан, «Точка роста», «150-мектеб» кIуру проектарикан, цIийиди диврайи мектебарикан, спортзаларикан, бицIидарин багъарикан, яна, саб гафниинди, конференцияйиз дуфнайи мялимариз, заведующйириз, главйириз саб сяаьтнан арайиъ варибдикан маракьлуди ктибтурайи доклад гъапIний.
Дугъан кьяляхъ райондин гъуларин мектебариан вуйи вакилари: О.М. Мусаевайи (ЧIилхъарин мектебдин директор), М.Р. Нежефовди (Мажвгларин кьялан мектебдин мялим), Аь.А. Аьлияров (Ярккарин кьялан мектебдин тербияйин вазифа гъабхурайи завуч) шубубсана докладар гъурхнийи. Дурари чпин мектебариъ гъапIу ремонтарикан, алахьурайи читин месэлйирикан, гьуркIри адру китабарикан гъапнийи ва ккудубшу йисандин натижйир гъивнийи.
Конференцияйин аьхириъ ккудубшу йисан чпин ужудар натижйир гъадагънайи мялимар, директорар ва бицIидарин багъарин заведующйир администрацияйин терефнаан пешкешар ва гьюрматнан грамотйир тувбиинди лишанлу гъапIнийи. Дурар исихъ ктухураза: А.С. Алескеров, В.Ш. Велибегов, Ф.М. Рамазанова, Г.А. Велибегов, А.Ж. Хидиров, К.А. Мурсалов, Ф.Ш. Зияудинова, Т.К. Гьяжиева, Ж.А. Аллагьвердиева, О.М. Мусаева.
Гъит, урхбан цIийи йис, гьаму мялимаризси, урхурайи баяр-шубаризра, студентаризра, абйир-бабаризра – варидариз мубарак ибшри. Ва райондин главайи гъапиганси, ГИА-йиан ужудар натижйир гъадагъури, мялимариз ужудар хъуркьувалар ишри, йислан-йисаз пешкешар, гьюрматнан грамотйир, заан категорйир ва Дагъустан Республикайин, Урусатдин Федерацияйин лайикьлу мялимар-аьлимар ухьуз бул ишри!
