Выставкайиан 74 медаль гъахну

Октябрин вазлин 9-диан – 12-дизкьан Москвайин ВДНХ-йин майдандиин кIули гъубшу вари Урусатдин гъулан мяишатдин сурсатарин «Гъизилин чвул-2019» выс-тавкайиъ Дагъустандиан гъулан мяишатдин сурсатарихъди ляхин гъабхурайи 30 кархана иштирак гъахьну. Дагъустан Республикайин делегацияйин кIулиъ РД-йин Правительствойин Председателин заместитель Аьбдулмуслим Аьбдулмуслимов ва РД-йин гъулан мяишатдина ипIру-убхъру сурсатарин министр Абзагьир Гьюсейнов айи.

РД-йин гъулан мяишатдин ва ипIру-убхъру сурсатарин Министерствойин пресс-гъуллугънаан учуз туву мялуматариинди, «Гъизилин чвул-2019» выставкайиз Дагъустандиан гъулан мяишатдин жюрбежюр сурсатарин аьхю кьадар хьади гъушну, гьадму гьисабнаан жюрбежюр консервйир, укIарикан вуйи чаяр, чяхирин сурсатар, жюрбежюр ширйир, минералин штар ва гьацдар жарадар. Мидланра гъайри, республикайиан выставкайиз, сабпи ражари вуди, ветеринарияйин цирклиан цIийиди адагънайи жюрбежюр комбикормар ва дармнарра гъухнийи.

КIули гъубшу выставкайин дахилнаъди дагъус-тандин карханйири Ирандиан, Азербайжандиан, Кир-гизияйиан, Москвайианна Екатеринбургдиан вуйи жюрбежюр карханйирихъди сатIиди ляхин апIбан йикьрар гъийитIну.

Выставкайин натижйириз ва жюрийи диву кьиматариз асас вуди, дагъустандин гъулан мяишатдин сурсатари 74 медаль гъазанмиш гъапIну. Гьадрарикан 51 медаль гъизилиндар, 15 – арсрандар, хъа 8 – кемшриндар ву. Къайд апIуб лазим вуки, жюрийи ихь республикайиан гъубху пIялцIукдиз варитIан заан кьимат дивну, ва гьацира дурари табии ширйир, жинснан малдарвалин ва ветеринария-йин цирклиан вуйи сурсатар асасдарси къайд гъапIну.

Мидланра гъайри, вари Урусатдин выставка артмиш апIбак лайикьлу пай кивбаз лигну, РД-йин Правительство Гран-при тувбиинди лишанлу гъапIну.