Аьхиримжи йигъари кми-кмиди республикайиъ, сибирин язва уьзриан инсанар иццру шула кIури, гафар ерхьура.
РД-йиъ айи Урусатдин Роспотребнадзорин Управлениейиан учуз туву мялуматариинди, гъийин йигъаз республикайиъ сибирин язва уьзриан инсанар иццру духьнайивалин 5 дюшюш ашкар дапIна. Гьадрарикан 4 касдин диагноз тасдикь гъабхьну, хъа сарсана кас духтрарин гюзчиваликк кка.
Уьзур кивбан асас себеб – гьаму уьзриан иццурайи маларихъди аьлакьайиъ хьувал ясана иццру малин йикк ипIувал вая никк убхъувал ву.
Иццру духьнайидарикан 3 кас Новолак райондин агьал-йир ву. Уьзур ачмиш дубхьнайивал аьгъю гъабхьиган, малдарвалин итIру сурсатар ахтармиш апIуз гъуху серенжемарин натижайиъ сибирин язва 49 кило йиккук ашкар гъапIну ва думу йикк дишлади цIа кипну гъубгну.
