Аьсрарин яш айи йиз багъри Ватан,
Ибшриву йигътIан-йигъаз лап авадан.
Багьа вузуз яв гьарсаб гъул, гьар майдан,
Уьмрин бина вува, йиз Табасаран.

Саринра улихь гъапIдарва юкIв усал,
Яв игитвал вардариз гъабхьну мисал.
Багъри жил`ин лик диву гъаних душман,
Инсаф дарди гьаъри гъахьну уьмриан.

Ургур чвуччвун гъала гъи дубхьна мядан,
Варжариинди кьабул дапIна хялар.
Гьар жюре кюкйирихъди балгна майдан,
Шадвал кIваъ ади лицура инсанар.

Хялужвди гъафириз вува лап жумарт,
Суфра ккипну, албагурва аьламат.
Намерд касдиз ачухъ апIдарва яв юкIв.
Бахтнан, шадвалин гъурубкьну увуз чIукI.

Рубас нирра – Табасарандин вакил,
Ихь шадвалихъ дидира мяъли хъипна.
Дагълар, дерйир ацIна – мюгькам вуй насил,
Гъубшу уьмур шадди кIваин апIура.

Шаирари лап гизаф дапIна яв ад,
Яв дагъларин, дюзенарин, гъуларин.
Яв ккадапIу рякъ`ин вуча гизаф шад,
Тарихарик дикIнайи цIарариин.

УрчвцIур йис тамам дубхьна гъи райондин,
Гюрчег саб мурччв ихь багьалу Ватандин.
Лап бахтлуди гъарабхри уьмур халкьдин,
Успагьи, гюзел пай ихь Дагъустандин.