Умгьанат Сулейманова

Цци 2026-пи йисан 16-пи октябри РФ-дин Президент Владимир Путинди сарсана дагъустанлу, Владивостокдиъ Тихий океандин гьюлин пияда кьушмарин 155-пи бригадайиъ гъуллугъ апIурайи подполковник Нариман Шихялиев йикIбан кьяляхъ «Урусат Федерацияйин Игит» ччвурнахъди лишанлу гъапIну.

Дупну ккундуки, 2025-пи йисан 2-пи июлиъ Курский областдинна Украинайин сяргьятариин чан эскервалин буржи тамам апIурайи ихь ватанагьли Нариман Шихалиевди чан жан игитриси фида гъапIну.

 
Нариман Шамсутдинович Шиха-лиевдин хизан табасаран райондин ТIивак гъул’ан ву. Хъа думу учв Мягьячгъалайиъ 1988-пи йисан бабкан гъахьну. Нариман чпин хизандиъ бицIину велед вуйи. Дугъу Аллагьди чаз туву жикъи уьмур гизаф маракьлуди ва игитвалиинди хъапIну. 2022-пи йисан 24-пи февралилан 2025-пи йисан июлин вазлизкьан Нариман Шихялиев ва дугъан ижми дуст, Урусатдин дявдинна гьюлин флотдин кIулиъ айирин заместитель, генерал-майор Михаил Гудков, ДНР ва ЛНР республикйир, Херсонский ва Николаевский областар, Херсон ва Мариуполь шагьрар азад апIури, чпин хиликк ккайи дестйирихъди гъизгъин женгариъ иштирак гъахьну. 2024-пи йисан украинайин гъачгъар Курский областдиин хабарсузди алархьу вахтна Михаил Гудков ва Нариман Шихялиев чпи идара апIурайи дестйирихъди ватандин жилар миллетчйирихьан азад апIуз гьаъру. Эскрарихъди заан дережайин женгнанна ватанпервервалин тербияйин ляхин гъабхбаз ва швнуб-саб ражну нацистарин алжагъбар дерккбаъ гъазанмиш гъапIу хъуркьувалариз лигну, Урусатдин оборонайин улихьдин министр Сергей Шойгуйи Нариман Шихялиевдиз дугъан ччвурнахъ вуйи яракь тувну, думу кьюб ражари Кьягьялвалин ордендихъди, «Ватандин улихь лишанлу хьпаз лигну» II дережайин ордендихъди, «Дирбаш’вализ лигну» медалиинди лишанлу гъапIну. Улихьна йигъари дугъаз шубубпи Кьягьялвалин орден тувну – гьяйифки, йикIбалан кьяляхъ.

 
Магьа ухьуз, табасаранариз, сарсанра Урусатдин Игит гъахьну. Амма, гьяйифки, кьюр жюрэтлу баяриз му заан ччвур йикIбан кьяляхъ тувну. Исрафил Мягьямедов ва Нариман Шихялиев гизаф улдукьу дустар вуйиштIан! Исрафили ва Нариманди Коломна шагьриъ ерлемиш дубхьнайи командирар гьязур апIру заан артиллерияйин училищейиъ гъурхну. Мурарин кьисматра магьа гьамциб гъабхьну. Кьюридра ухьхьан гъушну, амма дурарин уьмрар гьавайиди гъюдючIвундар: му Игитарин ччвурар гьаммишан насларин юкIвариъ гъузиди.

Анжагъ инсанвалин лишниккди му дюн’яйиз гъафи аку инсанар вахтсузди уьмриан гъягъюб аьхю хажалат ву. Думу кьюрид Игитарин уьмур сарун текрар даршлуб аьгъювали вари ихь ватанагьлийирин юкIвариз аьхю зиян апIура.