Гьаму йисан 13-пи сентябрилан башламиш дапIну, 24-пи сентябризкьан Кафари Кавказдин федеральный округдиъ миллетарин арайиъ дуствал уьбхбаз бахш дапIнайи «Дуствалин аквнан рякъ. Кавказдин чIвурдар-2026» Варихалкьарин проектди чан ляхин гъабхура. Проект уьмриз кечирмиш апIуз хъюгъхъанмина 2026-пи йисан 10 йис тамам дубхьна.

11-пи сентябри «Дагъу-стан» РИА-йин пресс-конференцйир гъахру залиъ мялуматарин дакьатарин вакиларихъди РД-йин милли политикайин ва диндин ляхнарин министрин заместитель ТIагьир Сутаев, регионарин арайиъ айи «Дуствалин аквнан рякъ» жямяаьтлугъ гьяракатнан председатель, RT телеканалин журналист ва документалист Руслан Гусаров, образованиейин программйирин гьяракатнан руководитель, «Дагълуйир» дестейин кIулиъ айи Загида Садикьова гюрюшмиш гъахьнийи.
Проект СКФО-йин ургуб регионди юрутмиш апIура: Дагъустандиъ, Ингушетияйиъ, Кабардино-Балкарияйиъ, Карачаево-Черкесияйиъ, Кафари Осетия-Аланияйиъ, Чечен Республикайиъ ва Ставропольский крайдиъ. Проектдиъ Урусатдин жюрбежюр регионариан 45 волонтери иштираквал гъабхура.

 
«Проектдин метлеб миллетарин, жара дин хъапIрударин, асас вуди жигьиларин, студентарин арайиъ айи дуствалин аьлакьйир мюгькам апIуб, мянфяаьтлу, сатIи вуйи зегьметниинди миллетарин арайиъ дуствалин рякъяр ккивуб, уьлкейин жара регионариан вуйи вакилар Кавказдихъди таниш апIуб – яна мялум даруб, тафавутлуб, маракьлуб ахтармиш ва аьгъю апIуб ву», – гъапнийи Руслан Гусаровди. Дугъан гафариинди, проектдин ччвур Кавказдин ва Дагъустандин лишнарикан саб вуйи чIвурдарин ва гьацира хабар тувру жара дараматарин юрушдилан арайиз гъафиб вуйи. Вахтар гъягъюра, чIвурдар даргъура, йирси шула. Гьаддиз волонтерари чпин ляхнин метлеб вуди чIвурдар уьрхюб, дурар рас апIуб, чIвурдарихьна рякъяр ачухъ апIуб гьисаб апIура.
Гьаму йисан дестейин дахилнаъ цIийи регионарин-Донецкдин ва Луганскдин халкьдин республикйирин – вакиларра а.
Чпи кюмек тувуз гъафи йигъан волонтерар гвачIниндиан лисузкьан культурайинна тарихдин ирснан дараматариин, сабпи нубатнаъди Кафари Кавказдин чIвурдариин лихуру, хъа лисхъан дуфнайидар региондин уткан йишварихъди таниш шулу, экскурсйириз гъягъюру.

 
Руслан Гусаровдин гафариинди, проектдиз сабсан сурат а – блогервал. «Ич волонтерар Кавказдиз гъафиган, ерли диндихъди таниш шулу, дурари электронный дневникариъ, социальный сетариъ ерли аьдатарикан ктибтуру. Ич проектдин мяна кюмек апIуб, ктибтуб ва дуствал апIуб вуйич», – аьлава гъапIнийи дугъу.
Проектдин иштиракчйири регионариъ ляхин ккудубкIбан кьяляхъ жикъи фильмйир адагъуру.
Проект миллетарин ляхнариз лигру федеральный агентствойин кюмекниинди уьмриз кечирмиш апIура.