Наргиз Гюлечова

 
1-пи августди, киш йигъан, Каспийскдин «Анжи-Арена» стадиондиин Мягьячгъалайин «Динамойинна» Москвайин «Локомотивдин» арайиъ Урусатдин премьер лигайин (РПЛ) 2-пи турин талит кIули гъубшну.

Талитнан сабпи пайнаъ «Локомотивди» Дагъустандин командайиз саб гол ипнийи. Хъа кьюбпи пай ккебгъруган, Мягьячгъалайин «Динамойин» саспи футболистар дигиш гъапIнийи. Гьадрар гьюдюхбиинди футбол уйнамиш апIбан ери дишлади дигиш гъабхьнийи, ва талит, ихь команда гъалиб дубхьну, 2-1 гьисабниинди ккудубкIнийи.
Уйнамиш давам шулайи 57-пи дакьикьайиъ Дагъустандин командайин 11-пи нумрайин Миройи ва 73-пи дакьикьайиъ 47-пи нумрайин Никита Глушков голар ирчнийи.

 
Хъа 4-пи августдира «Анжи-Арена» стадиондиин, РПЛ-лин рякъюъди вуйи FONBET Урусатдин Кубокдиз вуйи сабсана уйнамиш Самара шагьрин «Крылья Советов» футболин командайихъди кIули гъубшну.
Му талитнаъ Мягьячгъалайин командайин кIулин тренер Вадим Евсеевди майдандиина адау чан хиликк ккайи 11 футболистар, гьаму жюрейин составдин командаси, зат, гьич сабанкьан талитназ удучIвдар дар.

 
Талитнан сабпи пайнан 15-пи дакьикьа гъябгъюрайи вахтна «Крылья Советов» командайигъян ихь командайиз сабпи гол ипур Денис Макаров, хъа 63-пи дакьикьайиъ 2-пи гол ипур – Джеффри Чинеду ву.
Мягьячгъалайин «Динамойин» голикан кIуруш, кьюбпи пай ккебгъну 47-пи дакьикьикьайиъ командайин цIийи футболист Владимир Хубуловди пенальтийин гол Самарайин командайиз ипну. Гьисаб 1-2 хьпиинди ва ихьдарихъ хъабхъбиинди талит ккудубкIну