Наргиз Гюлечова

 
Гьар йигъан ухьуз жюрбежюр махлукьатлу хабрариан рякъяриин шулайи аварйирикан мялуматар ерхьур ахьуз. Дагъустандин рякъяриъди гьялакди машинар хъаърайиваликан аьрзйир дарапIрайидар анжагъ гьадму жюрейиинди машинар хъаърайидартIан даршул.

БицIи машинарикан улхурира дарза…

 
Жямяаьлугъ транспорт мисалназ гъадабгъиш, аьхю автобусарин ва микроавтобусарин рулихъ деънайи касари, учв гъахурайи пассажирарикан, дурариз хизанар айибдикан, хулаъ ккилигурайибдикан гьаз-вуш зат фикир апIурайиганси рябкъюрдар.
Узу саки гьар йигъан жямяаьтлугъ тарнспортдиъди гъягъюрайир вуза. Саб кIуруб, дурари машиндиъ эл хъдабгъуз дуршлугансикьан гизаф кьадар пассажирар итра, хъа кьюб кIуруб, рякъяриъ гьаз-вуш ва фтин- вуш гьюжатнаъ айиганси, сари тмунур хъидитну, кьяляхъди гъюриганси гъитуз чарйир зигури, айитI айидар адмийир ваъ, шишлар вуйиганси машин хъапIра. Чпи хъапIрайи машин дурари шагьрин айитI зат йишв адру рякъюъдира, гизаф машинарин пробкйир айи йишварианра гьаци хъапIру. Дицир касди я чакан, я чан машиндиъ айи пассажирикан, ясана жвуву рякъярин къайдйир зат уьрхюри адрубдикан фикир апIурадар. ИкибаштIан, рулихъ хъайидар гьацдар вуйивалиан Дагъустандин рякъяриъ шулайи аварйирин кьадар зат камра шуладар.
Ккудубшу гьацI йисандин арайиъ республикайин рякъяриъ духьнайин аварйирин статистика ва дурар фу себеб вуди арайиз гъафидар вуш, Дагъустандин премьер-министрин регьберваликкди кIули гъубшу Правительствойин комиссияйин заседаниейиъ РД-йин МВД-йин ГИБДД-йин Управлениейин начальникдин вазифйир вахтназди тамам апIурайи Мягьямад Садиковди мялуматар тувнийи.

 
Чан улхбаъ дугъу къайд гъапIганси, айи агьвалат дигиш апIбан бадали, йисандин сабпи гьацI пайнан арайиъ фукьан уьлчмйир кьабул дапIнашра, рякъяриъ аварйир арайиз гъювал гьич зат кам шуладар.
Мягьямад Садыковди туву мялуматариинди, ккудушу 6 вазлин арайиъ Дагъустандин рякъяриъ 836 авария гъабхьну. Гьадму аварйирин натижайиъ 1141 касдиз зийнар гъахьну ва 131 кас гъийихну. Гьадму гьисабнаан 125 аварияйиъ яшар бегьем дархьи 136 бицIириз зийнар гъахьну ва 10 бицIир гъакIну.
«Ахтармишари улупурайиганси, варитIан гизаф арайиз гъюрайи ДТП-йир, машинар саб-сабдихъ йивбаан ву. ДТП-йириъ кечмиш гъахьи касаринра гьацI пай машинар саб-сабдихъ йивбаан ву. Кьюбпи йишв’ин али аварйир яягъди гъягъюрайи касарихъ ва ишв’ин дерккнайи машинарихъ жара машин йивбаан арайиз гъюрайидар.
Хъа аьхиримжи 3 йисандин арайиъ мотоциклйирихъди аьлакьалу вуйи аварйирра фукьан вушра арайиз гъюра», – гъапну Мягьямад Садыковди.

 
Дагъустандин Правительствойин председатель Мягьямад Рама-зановди республикайин рякъяриин аварйир шули арайиз гъюрайи агьвалат дигиш апIбан ва машинариъди, мотоциклйириинди ва яягъди гъягъюрайи инсанарин хатIасузвал уьбхбаан гъахурайи ляхнар давам апIуб ккун гъапIну.
Мидланра савайи, Мягьямад Рамазановди МЧС-дихъди сатIиди Госавтоинспекцияйин Управление-йиз, туристар гъахурайи маршрутарин рякъярин аьгьвалат ахтармиш апIуз табшуругъра тувну.
Магьа июлин аьхиримжи гьяфтайиъра, янаки 27-пи июлиан 2-пи августдизкьан, республикайин рякъяриин 38 авария духьна. Думу аварйирин натижйириинди 50 касдиз жюрбежюр зийнар гъабхьну ва 11 кас гъийихну. Зийнар гъахьидарикан 3 ва гъийихдарикан 1 яшар бегьем дархьи бицIидар ву.