Наргиз Гюлечова

 
Сач, апрелин вазлин эвелариъ, гьадмуган республикайин главади лихурайи Сергей Меликов Дагъустандин Огни шагьриз гъушнийи. Думуган Меликов шагьрин «Труд» ччвур али кьялан стадиондин гьялнахъди таниш гъахьнийи ва учв гьадушваъ имиди, шагьрин администрацияйиз, стадион рас апIбан проект гьязур апIуз табшуругъ тувнийи.

Гьаму жюрейин проектар гьадмуган Избербаш ва Кьибла Сухокумск шагьрарира гьязур дапIнайи ва думу проектар уьмриз кечирмиш апIуз цци хъюгъну ккундийи. Аммаки гьелелиг ляхин ккебгъну адар. Мидин гьякьнаан республикайин финансаринна экономикайин улупбарин гьякьнаан гьар гьяфтайи кIули гъябгъюрайи РД-йин Правительствойин совещаниейиъ региондин министрарин кабинетдин председатель Мягьямед Рамазановди, гьаз вахтниинди объектарин тикилишчивалар ккергъну адарш, республикайин тялукь министерствйирин ва идарйирин гъуллугъчйирихьан ктибтуб тIалаб гъапIну.
Мягьямед Рамазановди мялум гъапIганси, объектар тишмиш апIуз кIури жара дапIнайи дакьатар хьадукран вазаритIан республикайин спортдин министерствойихьна дурукьна. Аммаки спортдин объектарин проектар гьаци кагъзарик гъузну ими. Тахсир, объектарин тикилишчивалин ляхнар гъахру подрядчикар агру конкурс лазим вуйи жюрейиин кIули дурубхувалиъ а.
Мидин гьякьнаан Мягьямед Рамазановди гъапиганси, гьюкуматди улихь дивнайи вазифайихьна вижнасузди янашмиш хьувал аьх апIуз шлу ляхин дар.

 
«Подрядчикар агувална конкурсар гъахувал заказчикдин тахсир вуди кьатI шулаш, дицдар касарин гьякьнаан уьлчмйир кьабул дапIну ккунду. Му ярамиш шлу ляхин дар. Дакьатар мартдин вазлитIан дурукьна, хъа ухьхьан объектдин тикилиш’валин ляхнар гъахру касарихъди вуйи контракт гъикьан йибтIуз шуладар», – гъапну правительствойин председатели.
Гьаз, 2026-пи йисан аьхириз, ляхник кипну ккуни проект, гъира кагъзариъ имиш, ич редакцияйиз, Дагъустандин Огни шагьрин спортдинна туризмдин ва жигьиларин ляхнариз лигру управлениейин начальник Вагиф Аьлибеговди ктибтну. Дугъан гафариинди, Дагъустандин главади Сергей Меликов айи вахтна, му проект республикайин правительствойин разивалиинди, РД-йин жигьиларин ляхнариз лигру министерствойи тешкил гъапIуб ву. Гьадмуган проектдин дахилнаъди шагьрин «Труд» ччвур али кьялан стадион рас апIуз кIури, 94 миллион манат жара гъапIнийи.
«Стадиондин капитально вуди расвалин ляхнар ккергъбаз мартдин вазлихъанмина ккилигурайидар вуча. Ич администрацияйин терефнаан лазим вуйи вари документар сачтIан гьязур дапIну тувнача. Проектдиъ гъалиб духьну, думу юрутмиш апIбан ляхнариз харж шлу вари дакьатар, региондин спортдин министерствойин хилиз дурукьнайи, фицики, му ляхнарин заказчик министерство ву. Магьан йис аьхирихънара гъюра, хъа стадиондин расвалин ляхнарихъ гьаз гьамусра хъюгъну адарш, аьгъдарчуз», – кIура управлениейин начальникди.

Учуз айи мялуматариинди, тикилишчивалин ляхнар гъахру компания гъядябгъбан бадали, кьюб ражари аукцион дубхна. Кьюбрид ражарира гъалиб гъабхьиб саб компания ву, амма, стадиондин тикилишчивалин ляхнар гъахуз кIури думу компанияйи гьязур дапIнайи документариъ къанунсузвалар ашкар гъахьну. Гьаддиз аукциондиъ иштирак шулайи жара компанйири, гъалиб гъабхьи компанияйиина документариъ атIагнайи къанунсузваларин гьякьнаан аьрзйир дикIури, кьюбрид ражарира суддин къарарниинди гъалибвал батIил апIуз гъитну.
«Гьамус тазакIултIан конкурс тешкил дапIну, хъанара конкурсдин аукциондиъ иштирак шлу подрядчикарин компанйир дагну, дурарикан саб компания гъядабгъяйиз, 3-4 ваз шулу. Тахсиркар Дагъустандин спортдин министерство ву. Хъа фу багьна ади му ляхин гьамци ярхи гъапIнуш, РД-йин Правительствойина тялухъ органари ахтармиш апIиди», – гъапнийи Вагиф Аьлибеговди.
Республикайин спортдин министерство тахсиркар вуди, Дагъустандин Огни, Избербаш ва Кьибла Сухокумск шагьрариъ цци тикмиш дапIну ккуни спортдин объектар хъа йисандин пландик кирчну. Думу объектариз жара дапIнайи дакьатарра хъайисаз илдичну. Мидин гьякьнаан правительстойин совещаниейиъ Мягьямед Рамазанов спортдин министр Сажид Сажидовдихъди хъял кади гъулхну.