Наргиз Гюлечова

 
ЦIиб улихьнаси Дагъустандин Правительствойин председатель Мягьямад Рамазановди республикайиъ имбу Ватандин Аьхю дявдин ветеранарикан сар вуйи Муса Багьаудиновдиз цIийи квартирайин жюлгер тувну. Улихьна йигъари Дагъустандин премьер-министр гьадму ветерандиин улукьуз Каспийск шагьриз гъушну. Ветерандихьна хялижвди дуфнайи Мягьямад Рамазановди, дугъаз цIийи квартирайихъди тебрик апIури, девдин женгариъ ветеранди улупу гьунарарикан ва Гъалибвалик киву пайнакан гъапнийи.

Ветерандиз тувнайи цIийи ва аку квартира Каспийск шагьрин гизаф мертебйирин хуларикан санубдиъ айиб ву. Му квартира Муса Мусаевичдин цIиинадин квартиратIан швнуб-саб ражари ужуб ва акуб ву. Таза квартира хуларин сабпи мертебейиъ айиб ву, ва подъездра дугъхьан гьар йигъан чIатариз удучIвуз шлуганси, варибдихъди тямин дапIна.

 
Чахьна гьюрматлу хялар дуфну имиди Ватандин Аьхю дявдин ветеранди телефондин зенгниинди республикайин Главайин вазифйир вахтназди тамам апIурайи Федор Щукиндихъдира гаф-чал гъапIну. Муса Багьаудиновди региондин глава 50 йисандин юбилейихъди тебрик апIури, дугъаз жандин сагъвал, ярхи уьмур ккун гъапIну ва чаз артухъ фикир тувбаз чухсагъулра гъапну.

 
Дупну ккундуки, 102 йисандин яшнаъ айи дявдин ветеран республикайин Правительствойин председателихъди гюрюшмиш шули сабпи раж дар. Мягьямад Рамазанов учв Правительствойин председательди деркку сабпи йигъарира ветерандиин улукьуз гъафнийи.
«Мягьямад Рамазанов марцци юкIв айи, чан хиликкди лихурайи касарикан ужуб ляхин тIалаб апIру, жюрэтлу кас вуйиб аьгъю шулу. Гьаддиз йиз дугъахьна аьхю гьюрматра айиз», – гъапну ветеранди.